Familjarë të dëshmorëve, veteranë, drejtues të pushtetit vendor dhe shumë qytetarë janë mbledhur sot me rastin e 5 Majit, Ditës së Dëshmorëve.
Në një ceremoni të organizuar enkas për këtë ditë, Kryetari i Bashkisë Bulqizë, z.Lefter Alla vlerësoi “Kjo ditë dallon nga çdo festë tjetër, s’është as kremtim fetar, e as festë pagane. Sot, është Dita e Dëshmorëve të Kombit, e atyre që s’njohën fe, besim e krahinë kur vendosën të dalin maleve për të mbrojtur atdheun. Është dita e atyre që kanë dhënë jetën e tyre për liri dhe demokraci, për të drejtat e njeriut dhe dinjitetin e çdo shqiptari. Kjo datë na çon plot 80 vjet më parë, më 5 maj të vitit 1942, kur u vra Qemal Stafa, i cili me veprimtarinë e tij u kthye në simbol të Luftës Antifashiste Nacionalçlirimtare.”
Sipas tij, “çdo shoqëri e rritur përmes vlerave, që ka kultivuar parime themelore në ecurinë e brezave, ndër të tjera i mëson kombit të vetë, të rinjve e të rejave, brezave të së ardhmes që të kthejnë kokën pas e të shohin rrugën e përshkuar ndër vite, dekada e shekuj, të jenë të vetëdijshëm se nga ku kanë ardhur, të kujtojnë dhe respektojnë historinë e të parëve të tyre dhe të mësojnë prej asaj kohe se ku do shkojnë në të ardhmen.”
Ndërkohë, duke nisur nga ky 5 Maj, Bashkia Bulqizë u ka dhuruar veteranëve një mjedis të posaçëm në Pallatin e Kulturës, i cili do të jetë në funksion të organizimeve të tyre dhe të mbledhjesh dhe ruajtjes së fakteve historike që datojnë me periudhën para çlirimit.
