Takim 2-ditor në Sofie me ftesë të kryetarit të Bashkisë së Mezdrës, z. Ivan Asparuhov.

Takim 2-ditor në Sofie me ftesë të kryetarit të Bashkisë së Mezdrës, z. Ivan Asparuhov. Bashkë me Mariglen Disha kryetarin e Bashkisë së Librazhdit dhe me përfaqësues të dy institucioneve tona zhvilluam një sërë takimesh të rëndësishme. Në takim me z. Asparuhov shprehëm vullnetin për të vazhduar bashkëpunimin në nivel lokal dhe për të thelluar lidhjet në disa fusha prioritare për të dy vendet. Në ditën e dytë të takimit, u pritëm nga zëvendës-presidentja e Bullgarisë, znj. Iliana Iotova, ku arritëm një marrëveshje të rëndësishme për rritjen e kapaciteteve të burimeve njerëzore për të përfituar nga mbështetja financiare e BE-së. Financimi i projekteve nga BE-ja ofron një mundësi të jashtëzakonshme që duhet të shfrytëzohet në mënyrë efektive. Po ashtu, me kënaqësi iu përgjigja pozitivisht interesit të gazetarëve për të diskutuar rreth mundësive konkrete të bashkëpunimit mes dy bashkive tona.

Fundjavë me të rinjtë e gjimnazit ‘Arbëria’ për të eksploruar resurset natyrore të Bulqizës. ‘Ujëvara e Duriçit’, një nga destinacionet turistike më të bukura të zonës, ofron një eksperiencë të jashtëzakonshme me ajër të pastër, ujë të ftohtë dhe një peisazh mahnitës. Një ftesë e hapur për të gjithë, #EjanëBulqizë për natyrën, historinë dhe trashëgiminë kulturore

Në prezencën e Ambasadorit Bullgar në Shqipëri, Z. Ivaylo Kirov, çelëm siparin e projektit ‘Rritja e kapaciteteve të punonjësve dhe njësive administrative të Bashkisë Bulqizë për agroturizmin dhe turizmin malor’, i financuar nga Ndihma Bullgare për Zhvillim. Aktivitetet e këtij projekti ecin në një linjë me përpjekjet që Bashkia po bën me mbështetjen e qeverisë shqiptare për promovimin e këtij sektori, që është kyç për zhvillimin e qëndrueshëm të ekonomisë dhe krijimin e vendeve të reja të punës. Përmirësimi i kapaciteteve të administratës së qeverisjes vendore është kusht i domosdoshëm për të siguruar një proces të suksesshëm të planifikimit dhe zhvillimit të agroturizmit dhe turizmit në nivel lokal.